தியேட்டர்களில் மீண்டும் ஆர்யா-சந்தானம் காம்போ... ரீரிலீசாகிறது 'பாஸ் என்கின்ற பாஸ்கரன்'..!

தமிழ் சினிமாவில் ஹரோக்களுக்கு ஹீரோயின்கள் இருக்கிறார்களோ இல்லையோ கண்டிப்பாக காமெடிக்கு சந்தானம் இருக்க வேண்டும் என்ற காலத்தை மீண்டும் மக்கள் மனதில் கொண்டு வந்த படம் சுந்தர் சியின் மத கஜ ராஜா, இப்படத்திற்கு பின் ஆர்யா மற்றும் சந்தானத்தின் கூட்டணி மீண்டும் அமைய வேண்டும் என பல ரசிகர்கள் கூறி வந்த நிலையில், தற்பொழுது இருவரும் சேர்ந்து படம் நடித்து கொண்டு இருக்கின்றனர். இப்படி இருக்க, நடிகர் சந்தானம், பல முன்னணி நடிகர்களுடன் காமெடியனாக பல படங்களில் நடித்து வடிவேலுவையே பின்னுக்கு தள்ளியவர். பின் இனி ஹீரோக்களுடன் இணைந்து காமெடி கதாபாத்திரங்களில் நடிக்க போவதில்லை என்று முடிவு செய்தவர் தற்பொழுது வரை காமெடி ஹீரோவாக வலம் வந்து கொண்டிருக்கிறார்.

இந்த சூழலில், நடிகர் சந்தானத்தின் ஆரம்ப வாழக்கை லொள்ளு சபாவில் தொடங்கியது. இதனை அடுத்து அவரது நகைச்சுவை திறமைக்கு பலனாக எஸ்.டி.ஆரின் "காதல் அழிவதில்லை"படத்தின் மூலம் முன்னணி நடிகராக அறிமுகமானார். ஆனால் பெரிதும் அப்படம் பேசப்படவில்லை என்றாலும், 2004 ஆம் ஆண்டு சிம்புவின் 'மன்மதன்' திரைப்படத்தில் நடித்து தனது காமெடி கதாபாத்திரத்திற்கு தனி இடத்தை உருவாக்கினார். பின் சிம்புவுடன் வல்லவன், காளை, சிலம்பாட்டம், வானம் மற்றும் ஒஸ்தி போன்ற படங்களில் ஹிட் கொடுத்தார். அதனை தொடர்ந்து சிறுத்தை,சிவா மனசுல சக்தி, பாஸ் என்கிற பாஸ்கரன் மற்றும் ஒரு கல் ஒரு கண்ணாடி, என பல படங்களில் இவரது நடிப்பும் இவரது காமெடியும் இல்லாமல் இருந்ததில்லை. இதனை தொடர்ந்து தற்பொழுது டிடி ரிட்டன்ஸ், வல்லவனுக்கு புல்லும் ஆயுதம், இங்கு நான் தான் கிங்கு, குளு குளு, சபாபதி என பல படங்களில் நடித்து ஹீரோவாக வலம் வந்து கொண்டு இருக்கிறார். 

இதையும் படிங்க: ரியல் நண்பேன்டா..! சந்தானத்தை ஹீரோவாக்கி படம் தயாரிக்கும் ஆர்யா.. முதல் பாடலுக்கு டீசர் வெளியிட்டு அதகளம்..!!

இவரை போல், நடிகர் ஆர்யாவும், விஷ்ணுவர்த்தன் இயக்கிய "அறிந்தும் அறியாமலும்" என்ற திரைப்படத்தில் பிரகாஷ் ராஜிக்கு மகனாக நடித்ததன் மூலம் அறிமுகமானார். இப்படத்தை தொடர்ந்து ஓரம் போ, நான் கடவுள், மதராசபட்டினம், பாஸ் என்கிற பாஸ்கரன், சிக்கு புக்கு, வேட்டை, சேட்டை, ராஜா ராணி, இரண்டாம் உலகம், ஆரம்பம் உள்ளிட்ட பல படங்களுக்கு மேல் நடித்து உள்ளார்.

இப்படி இவர்கள் இருவரின் படத்தை எடுத்து கணக்கிட்டால், அதிலும் தோராயமாக 10 படங்களுக்கு மேல் இருவரும் ஒன்றாக நடித்து இருப்பர். அப்படி இவர்கள் இருவரும் நடித்து பயங்கர ஹிட்டான திரைப்படம் என்றால் அது கடந்த 2010ம் ஆண்டு எம்.ராஜேஷ் இயக்கத்தில், ஆர்யா, சந்தானம், நயன்தாரா, விஜயலட்சுமி, சித்ரா லட்சுமணன், ஷகிலா, மொட்டை ராஜேந்திரன், சுப்பு பஞ்சு ஆகியோரின் நடிப்பில் வெளியான  'பாஸ் என்கிற பாஸ்கரன்"திரைப்படம்.

இப்படத்தில் ஆர்யா -சந்தானம் சேர்ந்து நண்பேண்டா...! என்று சொல்வதும், 'செஞ்சோற்று கடன் தீர்க்க' என்ற பாடலுக்கு சந்தானம் கொடுக்கும் ரியாக்ஷனும், 'தல தளபதி சலூனை' வைத்து அடி வாங்குவதும், பின் டுட்டோரியல் சென்டர் வைத்து வாழ்க்கையில் முன்னேறுவதும் என படம் முழுவதும் காமெடியாக இருக்கும். 

இந்த நிலையில், இத்திரைப்படம் இப்பொழுது தொலைக்காட்சியில் ஒளிபரப்பானாலும் அதனை காண ரசிகர்கள் உண்டு. அந்த வகையில், 15 ஆண்டுகளுக்குப் பிறகு, அமிர்தா பிலிம்ஸ் நிறுவனம் சார்பில் "பாஸ் என்கின்ற பாஸ்கரன்" திரைப்படம் வருகிற 21ம் தேதி 50க்கும் மேற்ப்பட்ட தியேட்டர்களில் ரீரிலீஸ் செய்யப்படுகிறது.

இதையும் படிங்க: வெளியானது ஆர்யாவின் "மிஸ்டர் எக்ஸ்".. ஃபர்ஸ்ட் சிங்கிளை பார்த்து ரசிகர்கள் கொண்டாட்டம்..!