டெல்லிக்கு அண்ணாமலை பயணம்.. அமித் ஷாவுடன் சந்திப்பு.. அதிமுக - பாஜக கூட்டணி தொடர்பாக அதிரடி மூவ்!!
அதிமுக - பாஜக இடையே கூட்டணி உறுதியாகி விட்டதாகக் கூறப்படும் நிலையில், மாநில பாஜக தலைவர் அண்ணாமலை டெல்லி சென்றுள்ளதாக தகவல் வெளியாகியுள்ளது.
- Wed, 26 Mar 2025 21:21:19 IST
by
Jagatheswari
- #
கடந்த ஆண்டு மக்களவைத் தேர்தலுக்கு முன்பாக கூட்டணியை முறித்த அதிமுக பொதுச் செயலாளர் எடப்பாடி பழனிசாமி, அக்கட்சியுடன் கூட்டணி இல்லை என்பத உறுதியாக இருந்தார். என்றாலும் மக்களவைத் தேர்தலில் அதிமுக போட்டியிட்ட எல்லா தொகுதிகளிலும் தோல்வி அடைந்தது. சில தொகுதிகளில் அதிமுக மூன்றாம் இடத்துக்கு சென்றது. அதிமுக - பாஜக கூட்டணி அமைந்திருந்தால் சில தொகுதிகளில் வெற்றி கிடைத்திருக்கும் என்று அப்போதே பேச்சு எழுந்தது. அதிமுகவின் இரண்டாம் கட்டத் தலைவர்கள் பாஜகவுடன் கூட்டணி சேர தொடர்ந்து விருப்பம் தெரிவித்திருந்தனர்.
தமிழகத்தில் அடுத்த ஆண்டு சட்டப்பேரவைத் தேர்தல் நடைபெற உள்ள நிலையில், வலுவான கூட்டணியை அமைக்க பழனிசாமி திட்டமிட்டார். இதேபோல பாஜகவின் தேசிய தலைமையும் அதிமுகவுடன் கூட்டணி வைக்க தீவிர முயற்சிகளை மேற்கொண்டது. இந்நிலையில் சட்டப்பேரவைக் கூட்டத்தொடர் நடக்கும்போதே அதிமுக முன்னாள் அமைச்சர்கள் எஸ்.பி.வேலுமணி, கே.பி.முனுசாமி டெல்லி சென்றனர். நேற்று இரவு திடீரென மத்திய உள்துறை அமைச்சர் அமித்ஷாவை அவரது இல்லத்தில் அதிமுக பொதுச் செயலாளர் பழனிசாமி உள்ளிட்டோர் சந்தித்துப் பேசினர். அவருடன் அதிமுக நிர்வாகிகளும் இருந்தனர்.
அப்போது, தமிழகத்தின் அரசியல் நிலவரம், கூட்டணி, சட்டம்-ஒழுங்கு பிரச்சினை உள்ளிட்டவை தொடர்பாக பேசப்பட்டதாகத் தெரிகிறது. இந்த சந்திப்பைத் தொடர்ந்து அமித்ஷா தனது எக்ஸ் வலைதளத்தில் பதிவு ஒன்றை வெளியிட்டார். அதில், ‘2026ல் தமிழகத்தில் தேசிய ஜனநாயகக் கூட்டணி அரசு அமைந்த பின்பு, மது வெள்ளமும், ஊழல் புயலும் முடிவுக்கு வந்துவிடும்’ என்று குறிப்பிட்டார்.
இந்நிலையில் இன்று காலை சென்னை விமான நிலையத்தில் செய்தியாளர்களைச் சந்தித்த எடப்பாடி பழனிசாமி, “எங்கள் சந்திப்பு 45 நிமிடங்கள் நடந்தது. அதில், முழுக்க முழுக்க மக்கள் பிரச்சினைகளை மட்டுமே பேசினோம். கூட்டணி பற்றியெல்லாம் எதுவும் நாங்கள் பேசவில்லை. தேர்தலுக்கு இன்னும் ஓராண்டு இருக்கிறது. எனவே கூட்டணி தொடர்பாக தேர்தல் நெருக்கத்தில் பேசப்படும்” என்று கூறினார்.
இந்நிலையில், பாஜக மாநிலத் தலைவர் அண்ணாமலை இன்று இரவு டெல்லி புறப்பட்டுச் சென்றார். நாளை (வியாழக்கிழமை) அவர் உள்துறை அமைச்சர் அமித் ஷா மற்றும் கட்சியின் மூத்த நிர்வாகிகளை சந்திக்க உள்ளதாகக் கூறப்படுகிறது. தமிழக அரசியல் நிலவரம், அதிமுக கூட்டணி தொடர்பான தமிழக பாஜகவின் நிலைப்பாடு குறித்து அறிய பாஜக தேசிய தலைமை அண்ணாமலையை டெல்லிக்கு அழைத்திருப்பதாக கூறப்படுகிறது.
இதையும் படிங்க: அதிமுக - பாஜக கூட்டணிக்கு நிச்சயம் முடிஞ்சிடுச்சு.. கல்யாணம் எப்போன்னு தெரியல.. செமயாக கலாய்த்த திமுக கூட்டணி கட்சி!!
இதையும் படிங்க: கூட்டிக் கழிச்சி பாருங்க கணக்கு சரியா வரும்.. தப்புக் கணக்கு போடுவதாக கூறிய தங்கம் தென்னரசுக்கு எஸ்.பி. வேலுமணி பதிலடி,!!
