கராத்தே மாஸ்டர் ஷிகான் ஹுசைனி காலமானார்..!

மதுரையை பூர்வீகமாகக் கொண்ட கராத்தே மாஸ்டர் ஷிகான் ஹுசைனி கே.பாலசந்தர் மூலம் 'புன்னகை மன்னன்' திரைப்படத்தில் அறிமுகமானார். தொடர்ந்து, வேலைக்காரன், மூங்கில் கோட்டை, உன்னை சொல்லி குற்றமில்லை என சில படங்களில் நடிக்க ஆரம்பித்தார்.

மேலும் ரஜினிகாந்த் நடித்த ப்ளட் ஸ்டோன் என்ற ஹாலிவுட் படத்திலும் ஹுசைனி வேலை செய்துள்ளார். விஜய்யின் பத்ரி படத்தின் மூலம் ரசிகர்களிடையே கவனத்தை ஈர்த்த ஹுசைனி விஜய்க்கு உடற்பயிற்சி பயிற்சியாளராக நடித்திருந்தார்.மேலும் பலருக்கு வில் வித்தை பயிற்சியையும் அவர் அளித்துள்ளார். 

இதையும் படிங்க: உடல் தானம் செய்ய போறேன்.. ஆனால் என் இதயத்தை மட்டும்..! ஷிகான் ஹுசைனி உருக்கம்..!

இந்நிலையில் தான் ரத்த புற்றுநோயால் பாதிக்கப்பட்டுள்ளதாக யூடியூப் சேனல் ஒன்றுக்கு பேட்டி அளித்தார். அதில், தனக்கு ரத்த புற்றுநோய் வந்திருக்கிறது என்றும் 4 வது நிலையை அடைந்துவிட்டதாகவும், இதற்கு மொத்தம் மூன்று காரணங்கள் சொல்வதாகவும் தெரிவித்தார். தான் ஒருநாள் வாழ்வதற்கு 2 யூனிட் ரத்தம் மற்றும் பிளேட்லெட்ஸ் வேண்டும் என்றும் இன்னும் கொஞ்ச நாள்தான் உயிரோடு இருப்பேன் எனவும் கூறி இருந்தார்.

 இதனையடுத்து, பாஜக மாநில தலைவர் அண்ணாமலை ஷிகான் ஹூசைனிக்கு ஆறுதல் கூறினார். இதனையடுத்து ஷிகான் ஹுசைனி துணை முதலமைச்சரும், விளையாட்டுத் துறை அமைச்சருமான உதயநிதி ஸ்டாலினுக்கு கடிதம் எழுதி இருந்தார்.துணை முதலமைச்சர் உதயநிதி ஸ்டாலினின் அறிவுறுத்தல் படி ஷிகான் ஹுசைனியின் மருத்துவ சிகிச்சைக்காக 5 லட்ச ரூபாய் நிதியுதவி வழங்கப்பட்டது.

தொடர்ந்து புற்றுநோய்க்கு சிகிச்சை பெற்று வந்த அவர், இன்று சிகிச்சை பலனின்றி காலமானார். அவரது மறைவு கராத்தே, வில்வித்தை கலைஞர்கள் மற்றும் பொதுமக்களிடையே பெரும் சோகத்தை ஏற்படுத்தி உள்ளது. பலரும் அவருக்கு இரங்கல் தெரிவித்து வருகின்றனர்.

முன்னதாக தான் உயிரிழந்த மூன்று நாட்களுக்கு பிறகு, தனது உடலை ஸ்ரீ ராமசந்திரா மருத்துவமனை மற்றும் பல்கலைக்கழகத்திற்கு தானம் செய்ய விரும்புவதாக ஹூசைனி கூறி இருந்தார் என்பது குறிப்பிடத்தக்கது.

இதையும் படிங்க: மனச விட்டுறாதீங்க அண்ணா..! ஷிகான் ஹுசைனிக்கு ஆறுதல் கூறிய அண்ணாமலை..!