காங்கிரஸில் உள்ள பாஜக ஏஜெண்டுகளை நீக்க முடியுமா..? தன் கட்சிக்கு தானே கொல்லி வைக்கும் ராகுல்..!

குஜராத்தில் பலவீனம் அடைந்துள்ள காங்கிரசுக்கு புத்துயிர் கொடுக்கும் வகையில், ராகுல் காந்தி தீவிர மாற்றங்களை சூசகமாக தெரிவித்துள்ளார். சனிக்கிழமை நடைபெற்ற கட்சிக் கூட்டத்தில், குஜராத் காங்கிரஸ் தொண்டர்கள் இதுவரை எழுப்பிய பிரச்சினைகளை அவர் பட்டியலிட்டார். ராகுல் காந்தி, தனது கடுமையான நிலைப்பாட்டைக் காட்டி, குஜராத்தில் உள்ள பல காங்கிரஸ் தலைவர்கள் பாஜகவுடன் கூட்டுச் சேர்ந்துள்ளதாகவும், அவர்கள் 30-40 பேரை வெளியேற்றத் தயாராக இருக்க வேண்டும் என்றும் அதிரடி காட்டினார். 'துரோகிகள்' கட்சியிலிருந்து வெளியேற்றப்படுவார்கள் என்றும் எச்சரிக்கை விடுத்தார். கட்சியில் ஒரு 'ஆபரேஷனை' எதிர்பார்க்கும் தலைவர்கள் ராகுலின் அறிக்கையால் மகிழ்ச்சியடைந்து உள்ளனர். ஆனால் இந்த நடவடிக்கை கட்சிக்கு பின்னடைவை ஏற்படுத்தக்கூடும் என்ற அச்சமும் எழுந்துள்ளது. 

ராகுல் காந்தியின் குஜராத் பயணம் அம்மாநில காங்கிரசில் பரபரப்பை ஏற்படுத்தியுள்ளது. உள்கட்சிப் பூசலைக் குறிப்பிட்டு, ராகுல் காந்தி தனது சொந்தக் கட்சியின் குறைபாடுகளை வெளிப்படையாகப் பட்டியலிட்டார். பாஜகவுக்கு நெருக்கமான தலைவர்களையும் எச்சரித்தார். ஏப்ரல் 8-9 தேதிகளில் அகமதாபாத்தில் நடைபெறும் அகில இந்திய காங்கிரஸ் கமிட்டி கூட்டத்திற்குப் பிறகு, கட்சியில் சில மாற்றங்கள் இருக்கும் என்று இப்போது நம்பப்படுகிறது. குஜராத்தில் கட்சியின் நிலைமை தவறான முடிவுகளின் விளைவு என்று காங்கிரஸ் தொண்டர்கள் நம்புகிறார்கள்.

இதையும் படிங்க: தமிழை விட சமஸ்கிருதமே பழமையான மொழி.. பாஜக எம்.பி. நிஷிகாந்த் துபே சர்ச்சைப் பேச்சு..!

பாஜகவுடன் போட்டியிட காங்கிரஸ் தலைமை எந்த பெரிய உத்தியையும் வகுக்காததால், கடந்த 30 ஆண்டுகளாக குஜராத்தில் காங்கிரஸ் ஆட்சியில் இல்லை. கடந்த இருபது ஆண்டுகளில், 75 மூத்த தலைவர்கள் காங்கிரஸ் மேலிடத்தின் மீது அதிருப்தி அடைந்து வெளியேறியுள்ளனர். அவர்களில் பலர் பாஜகவில் சேர்ந்து இப்போது காங்கிரஸுக்கு சவால் விடுகின்றனர். மறுபுறம், கடந்த பத்தாண்டுகளில் காங்கிரஸ் செய்த சாதி அடிப்படையிலான சோதனைகள் அனைத்தும் தோல்வியடைந்துள்ளன. படேல் சமூகத்தை கவர, ராகுல் காந்தியே குறுகிய காலத்திற்குள் ஹார்திக் படேலுக்கு மாநிலத் தலைவர் பதவியை வழங்கினார்.

தலித் வாக்காளர்களை கவர, கட்சியில் அல்பேஷ் தாக்கூருக்கு ஒரு பெரிய பொறுப்பு வழங்கப்பட்டது. அந்த நேரத்தில் கட்சியின் பழைய தலைவர்கள் ஏமாற்றமடைந்தனர். பின்னர் ஹார்திக் படேல் பாஜகவுக்கு தாவினார். குஜராத் காங்கிரசில், பரேஷ் தனானி போன்ற தலைவர்கள் அம்ரேலி தொகுதியில் தேர்தலில் தோல்வியடைந்தனர். ஏனெனில் மாநிலத் தலைமையால் வாக்களிக்கும் வரை தொண்டர்களை ஒற்றுமையாக வைத்திருக்க முடியவில்லை. 2017 ஆம் ஆண்டு எம்.எல்.ஏக்கள் ரிசார்ட்டில் தங்க வைக்கப்பட்ட விதம் அகமது படேலின் வெற்றியை உறுதி செய்வதற்காகவே என்று ஆர்வலர்கள் நம்புகின்றனர்.

பரேஷ் தனானிக்கு செல்வாக்கும் மக்களின் ஆதரவு கிடைக்கவில்லை. அவர் தொடர்ந்து தனியாகப் போராடினார். இது மூத்த தலைவர்களிடையே கூட அதிருப்தியை ஏற்படுத்தியது. இது காங்கிரஸ் தலைமையின் தவறு. ஒவ்வொரு மாநிலத்திற்கும், அதன் சொந்த வழிமுறைகள் இருப்பதாக ஒரு மூத்த தலைவர் கூறினார். காங்கிரஸ் எப்போதும் சாதி எல்லைகளுக்கு அப்பாற்பட்டு செயல்பட்டு வருகிறது. ஆனால், குஜராத்தில் அக்கட்சி சாதி சமன்பாடுகளில் சிக்கியுள்ளது.

இப்போது குஜராத்தில் உள்ள அனைத்து மட்டங்களிலும் இருக்கும் கட்சிகளை காங்கிரஸ் கலைக்கலாம். புதியவர்களை நியமிக்கலாம். அடிமட்ட அரசியலுடன் தொடர்புடையவர்களுக்கும், மக்களுடன் இணைந்து பணியாற்றுபவர்களுக்கும் அதிக அதிகாரங்களை வழங்க முடியும். ராகுல் காந்தி, பாஜகவின் ஏஜெண்ட் என்று தலைவர்களைக் குற்றம் சாட்டிய விதம், நிலைமையை மோசமாக்கக்கூடும். காங்கிரஸ் மரபின்படி, கட்சியின் முடிவுகளை மாநிலப் பொறுப்பாளரும், மாநிலத் தலைவரும் எடுத்தால், இந்தத் தலைவர்கள் மீது ராகுல் நடவடிக்கை எடுப்பாரா? புதிதாக நியமிக்கப்படுபவர்களுக்கு வேலை செய்ய சுதந்திரம் கிடைக்கும் என்பதற் என்ன உத்தரவாதம்? கட்சியில் பாஜக ஏஜெண்டுகள் என யாரை தீர்மானிப்பார்கள்?

இந்த நடவடிக்கைக்கான எதிர்வினைக்கும் கட்சி தயாராக இருக்க வேண்டும். கட்சியில் இருந்து ஏஜெண்டுகளை வெளியேற்றுவதற்கு முன்பு, வெகுஜன அடித்தளத்தைக் கொண்ட தலைவர்களை மீண்டும் கொண்டு வருவது காங்கிரசுக்கு முக்கியம். 2027 சட்டமன்றத் தேர்தலுக்கு முன்பு காங்கிரசுக்கு நெருக்கடி ஏற்பட்டால், கட்சி பெரும் இழப்பைச் சந்திக்கும். செயல்களுக்கு எதிர்வினை இருப்பது இயல்பானது. பாஜக தனது எதிரி கட்சிகளின் வீடுகளில் அப்படிப்பட்ட வாய்ப்புகளைத்தான் தேடுகிறது.

இதையும் படிங்க: அவதூறுகளை அள்ளி கொட்டறது தான் இவங்களுக்கு வேலை… திமுகவை விளாசிய எல்.முருகன்!!