தமிழகத்தில் தொடரும் அதிர்ச்சி...வெள்ளியங்கிரி மலையேறிய பக்தர் மயங்கி விழுந்து உயிரிழப்பு..!

கோவை வெள்ளிங்கிரி மலை ஏறிய திருவண்ணாமலை மாவட்டத்தை சேர்ந்த நபர் சாமி தரிசனம் செய்துவிட்டு வந்த போது, மூன்றாவது மலையில் மயங்கி விழுந்து உயிரிழந்த சம்பவம் பெரும் பரபரப்பை ஏற்படுத்தியுள்ளது. 

திருவண்ணாமலை மாவட்டம் பழையனூர் கிராமத்தைச் சேர்ந்தவர் சிவா (40). இவரது மனைவி நித்தியா, இவர்களுக்கு 3 ஆண் குழந்தைகள் உள்ளனர். மேலும் சிவா கர்நாடகா மாநிலம் பெங்களூருவில் பலசரக்கு பெட்டிக்கடை வைத்து நடத்தி வந்தார்.  இந்நிலையில் சிவா தனது உறவினர்கள் மற்றும் நண்பர்களுடன் நேற்று கோவை பூண்டியில் உள்ள வெள்ளிங்கிரி மலை ஏற்றத்திற்காக கோவை வந்தனர்.

நேற்று இரவு அனைவரும் மலை ஏறிய நிலையில்,  ஏழாவது மலையில்  சாமி தரிசனம் செய்துள்ளனர். பின்னர்  இன்று அதிகாலை 4.30 மணியளவில் கீழே இறங்கி உள்ளனர்.  அப்போது மூன்றாவது மலையில் வந்த போது திடீரென சிவா மயங்கி விழுந்தார். அங்கிருந்தவர்கள் அவருக்கு முதலுதவி செய்து, ஒன்றாவது மலையில் இருந்த அவசரகால மருத்துவரும் அங்கு சென்று சிவாவை பரிசோதனை செய்தார். அப்போது சிவா உயிரிழந்தது தெரியவந்தது.

இதையும் படிங்க: ‘ஜம்மு காஷ்மீரை விட்டு வெளியேறுங்கள்’: ஐநாவில் பாகிஸ்தானுக்கு இந்தியா கடும் எச்சரிக்கை..!

இதையடுத்து வனத்துறையினர் மற்றும் ஊழியர்கள்,  உறவினர்கள் சிவாவின் உடலை அடிவாரத்திற்கு தூக்கி வந்தனர். தகவலறிந்து  வந்த ஆலந்துறை போலீசார், சிவாவின் உடலை மீட்டு பிரேத பரிசோதனைக்காக கோவை அரசு மருத்துவமனைக்கு அனுப்பி வைத்தனர்.  மேலும் சம்பவம் தொடர்பாக வழக்கு பதிவு செய்து விசாரணை மேற்கொண்டு வருகின்றனர்.

முதல் கட்ட விசாரணையில் சிவாவிற்கு கடந்த இரண்டு ஆண்டுகளுக்கு முன்பு இருதய பிரச்சனை இருந்ததாகவும், அதற்காக ஆஞ்சியோ சிகிச்சை எடுத்ததும் தெரியவந்தது. இருதய பாதிப்பு உள்ளவர்கள் வெள்ளிங்கிரி மலையற்றத்தை தவிர்க்க வேண்டும் என மருத்துவர்கள் அறிவுறுத்தியுள்ளனர். உடல் நலக்குறைவால் திருச்செந்தூர், ராமேஸ்வரம், பழனியில் பக்தர்கள் உயிரிழந்த நிலையில், தற்போது வெள்ளியங்கிரி மலையேறிய பக்தர் உயிரிழந்தது தமிழகத்தில் அதிர்ச்சியை ஏற்படுத்தியுள்ளது. 

இதையும் படிங்க: ஒரே நேரத்தில் கூடும் 10,000 பெண்கள்.. வள்ளி கும்மி நடன நிகழ்ச்சியில் பங்கேற்கும் முதல்வர்..!