முதல்வர் சந்திரபாபு, துணை முதல்வர் பவன் கல்யாண் குடும்பம் குறித்து அவதூறாக பேசி வந்த காமெடி நடிகர் போசானி கிருஷ்ண முரளியை ஆந்திர போலீசார் கைது செய்தனர்.  ஹைதராபாத்தின் யெல்லரெட்டிகுடாவில் உள்ள நியூ சயின்ஸ் காலனிக்கு அருகிலுள்ள அவரது இல்லத்தில் இருந்து போசானி கிருஷ்ண முரளியை  போலீசார் கைது செய்தனர். கிருஷ்ண முரளியின் மனைவிக்கு வழங்கப்பட்ட கைது ஆணைப்படி அவர் ஐபிசி பிரிவுகள் 196, 353 (2), மற்றும் 111 உடன் 3 (5) மற்றும் குற்றவியல் பிரிவு 47 (1) மற்றும் (2) ஆகியவற்றின் கீழ் கைது செய்யப்பட்டார். இருப்பினும், அவர் கைது செய்யப்பட்டதற்கான காரணம் குறித்து காவல்துறையினரிடமிருந்து தெளிவு  எதிர்பார்க்கப்படுகிறது.

கிருஷ்ணா முரளி மீது குற்றம் சாட்டப்பட்டுள்ள குற்றம் விசாரணைக்கு உட்படுத்தத்தக்கது. ஜாமீனில் வெளிவர முடியாதது, அவர் நீதிமன்றக் காவலுக்காக ராஜம்பேட்டை 1 ஆம் வகுப்பு கூடுதல் ஜூடிசியல் மாஜிஸ்திரேட்டுக்கு அனுப்பப்பட்டுள்ளார் என்று சம்பேபள்ளி துணை ஆய்வாளரின் அதிகாரத்தின் கீழ் வழங்கப்பட்ட அறிவிப்பில் தெரிவிக்கப்பட்டுள்ளது. தற்போது காவல்துறையினர் போசானி கிருஷ்ண முரளியை ஆந்திராவிற்கு அழைத்து செல்கின்றனர். அவர் கைது செய்யப்பட்ட வீடியோக்கள் இணையத்தில் வைரலாகி வருகின்றன.

இதையும் படிங்க: வெளியாவதற்கு முன்பே சிக்கலை எதிர்கொள்ளும் Bad Girl.. சென்சார் போர்டு சொன்ன தகவல் இதுதான்..!

டோலிவுட் காமெடி  நடிகரும், ஒய்.எஸ்.ஆர். காங்கிரஸ் ஆதரவாளரான போசானி கிருஷ்ண முரளி  ஒய்.எஸ்.ஆர். காங்கிரஸ் கட்சியின் ஜெகன் மோகன் ரெட்டி  ஆட்சியின் போது தெலுங்கு தேசம் கட்சித் தலைவர் சந்திரபாபு நாயுடு, ஜனசேனா கட்சி தலைவர் பவன் கல்யாண் மற்றும் அவரது குடும்பத்தினருக்கு  எதிராக கடுமையான விமர்சனங்களை தெரிவித்து வந்தார். 

இந்த நிலையில் ஆந்திராவில்  கூட்டணி அரசு ஆட்சிக்கு வந்த பிறகு ஆந்திராவில் பல இடங்களில் போசானி கிருஷ்ண முரளி மீது வழக்குகள் பதிவு செய்யப்பட்டன. அன்னமய்யா மாவட்டத்தில் பதிவு செய்யப்பட்ட இந்த வழக்கில் போலீசார்  ஐதராபாத்தில் உள்ள அவரது வீட்டிற்குச் சென்று போசானியைக் கைது செய்தனர். இன்று அவரை நீதிமன்றத்தில் ஆஜர்படுத்தி காவலில் எடுப்பதற்கான ஏற்பாடுகள் பணியில் ஈடுப்பட்டு வருகின்றனர்.

இந்தச் சூழலில், போசானி கைது செய்யப்பட்டதற்கு ஒய்.எஸ்.ஆர். காங்கிரஸ் தலைவர்  ஜெகன் மோகன்   கண்டனம் தெரிவித்தார். ஐதராபாத்தில் உள்ள அவரது மனைவி போசானி குசுமலதாவிற்கு போனில்   பேசினார். ஆந்திராவில் கூட்டணி அரசு  கொடுங்கோல் ஆட்சியை நடத்தி வருவதாகவும், இந்தக் கைது நடவடிக்கையில் ஒய்.எஸ்.ஆர். காங்கிரஸ் கட்சி  அவருக்கு தேவையான உதவிகளை  செய்யும்  என்று உறுதியளித்தார். 

கூட்டணி அரசாங்கத்தில் நடக்கும் விவகாரங்களை மக்களும் கடவுளும் பார்த்துக் கொண்டிருக்கிறார்கள் . எனவே கடினமான காலங்களில் தைரியமாக இருக்க வேண்டும். போசானி கிருஷ்ண முரளியின் மனைவிக்கு ஒய்.எஸ்.ஆர். காங்கிரஸ் கட்சி சார்பாக சட்ட உதவி வழங்குவதாக ஜெகன் மோகன் உறுதியளித்தார். இந்த விவகாரத்தில் ஏற்கனவே கட்சியின் மூத்த வழக்கறிஞர்களிடம் ஒப்படைக்கப்பட்டுள்ளதாக ஜெகன் மோகன் அவரிடம் கூறினார்.  

அன்னமய்யா மாவட்டத்தில் உள்ள ஒபுலவாரிபள்ளே காவல் நிலையத்திற்கு போசானியை அழைத்து வந்த பிறகு, முதற்கட்ட விசாரணைக்குப் பிறகு நீதிமன்றத்தில் ஆஜர்படுத்த போலீசார் தயாராகி வருவதால் ஒய்.எஸ்.ஆர் காங்கிரஸ்  வழக்கறிஞர்கள்  அங்கு சென்று ஜாமின் பெற முயன்று வருகின்றனர்.

இதையும் படிங்க: பாடகர் ஜேசுதாஸுக்கு என்ன ஆச்சு?... மகன் வெளியிட்ட பரபரப்பு தகவல்...!