தமிழக பாஜக தலைவர் தேர்தல் வரும் 12 ஆம் தேதி நடைபெற உள்ள நிலையில், தேர்வுக்கான வேட்புமனு தாக்கல் இன்று தொடங்குகிறது. இது தொடர்பாக தமிழக பாஜக மாநிலத் துணை தலைவர் எம். சக்ரவர்த்தி வெளியிட்ட அறிவிப்பில், நமது கட்சியின் அமைப்பு பருவ தேர்தல் திருவிழாவின் இறுதிக் கட்டத்தை அடைந்துள்ளதாகவும், கிளை தொடங்கி மாவட்டத் தலைவர், மாநில பொதுக்குழு உறுப்பினர்கள் வரையிலான தேர்தல் முடிந்து தற்பொழுது இறுதியாக மாநிலத் தலைவர் மற்றும் தேசிய பொதுக்குழு உறுப்பினர்கள் தேர்தலுக்கான விருப்ப மனுக்கள் வரவேற்கப்படுவதாகவும் கூறியுள்ளார்.

மேற்கண்ட தேர்தலுக்கான விருப்பமனுக்களை கட்சியின் இணையதளமான www.bjptn.com என்ற இணையதளத்திலிருந்து பதிவிறக்கம் செய்து கொள்ளலாம் என்றும் இன்று (11.04.2025) மதியம் 02.00 மணி முதல் மாலை 4 மணி வரை போட்டியிட விருப்பமுள்ளவர்கள் விருப்பமனுவை மாநிலத் தலைமை அலுவலகத்தில் சமர்ப்பிக்குமாறும் தெரிவிக்கப்பட்டுள்ளது.

இதையும் படிங்க: மயங்கி விழுந்த பா.சிதம்பரம்.. பதறிபோய் ஃபோன் போட்ட மோடி.. நன்றி தெரிவித்து நெகிழ்ச்சி!!

மேலும், மாநில தலைவர் பதவிக்கு போட்டியிட விரும்புபவர்கள் படிவம் F-ஐ பூர்த்தி செய்ய வேண்டும் என்றும் மூன்று பருவம் தீவிர உறுப்பினராகவும், குறைந்தது பத்து வருடங்கள் அடிப்படை உறுப்பினராகவும் உள்ளவர் மட்டுமே மாநில தலைவர் பதவிக்கு போட்டியிட தகுதி பெறுவர் எனவும் கூறியுள்ளார்.

தேர்தெடுக்கப்பட்ட மாநில பொதுக்குழு உறுப்பினர்கள் 10 பேர் எழுத்து பூர்வமான ஒப்புதல் கொடுத்து பரிந்துரைக்க வேண்டும் எனவும் தேசிய பொதுக்குழு உறுப்பினர் பதவிக்கு போட்டியிட விரும்புபவர்கள் படிவம் E பூர்த்தி செய்ய வேண்டும் எனவும் தெரிவிக்கப்பட்டுள்ளது.

மாநில பொதுக்குழு உறுப்பினர் ஒருவர் இதனை முன் மொழிய மற்றொரு மாநில பொதுக்குழு உறுப்பினர் வழிமொழிய வேண்டும் என்றும் கூறப்பட்டுள்ளது. இதனிடையே, சென்னை வந்துள்ள உள்துறை அமைச்சர் அமித்ஷா, தமிழக பாஜக தலைவர் நியமனம் தொடர்பாக ஆலோசனை நடத்த உள்ளதாகவும் தகவல் வெளியாகி உள்ளது.

இதையும் படிங்க: ஆளுநரை மாற்றும் பேச்சுக்கே இடமில்லை.. 2026இல் புதிய முதல்வருக்கு பதவி பிரமாணம் செய்து வைப்பார்.. பாஜக அதிரடி!!