மனோஜ் போய்விட்டான்டா … துக்கம் தாளாமல் சீமானிடம் கதறிய பாரதிராஜா

இயக்குனர் பாரதிராஜாவின் மகன் மனோஜ் கடந்த 1999 ஆம் ஆண்டு தாஜ் மஹால் என்ற திரைப்படத்தின் மூலம் கதாநாயகனாக அறிமுகமாகி, தொடர்ந்து சமுத்திரம், கடல் பூக்கள், அல்லி அர்ஜுனா, வருஷமெல்லாம் வசந்தம், ஈர நிலம் போன்ற வெற்றி திரைப்படங்களில் நடித்துள்ளார்.

கடந்த 2023 ஆம் ஆண்டு வெளியான மார்கழி திங்கள் படத்தின் மூலம் இயக்குனர் அவதாரம் எடுத்த மனோஜ், ஈஸ்வரன், மாநாடு மற்றும் விருமன் திரைப்படங்களில் நடித்துள்ளார்.கடைசியாக அவர், ஸ்னேக்ஸ் அண்ட் லேடர்ஸ் வெப் தொடரில் நடித்து இருந்தார். இந்நிலையில் மனோஜ் மாரடைப்பு காரணமாக நேற்று அவரது வீட்டில் காலமானார். இவரது மறைவுக்கு அரசியல் கட்சி தலைவர்கள் மற்றும் திரைபிரபலங்கள், ரசிகர்கள் உள்ளிட்ட பலர் இரங்கல் தெரிவித்து வருகின்றனர்.இவருடைய இறப்பு திரையுலகில் உள்ள அனைவரையும் அதிர்ச்சியடைய செய்துள்ளது.

இதையும் படிங்க: மான நஷ்ட ஈடு வழக்குப் போடுவேன்..! நடிகை விஜயலட்சுமியின் புது வீடியோ..!

இந்த நிலையில் காலமான மனோஜின் உடல் கிழக்கு கடற்கரை சாலை நீலாங்கரையில் உள்ள பாரதிராஜா இல்லத்திற்கு இறுதி சடங்கிற்காக கொண்டு செல்லப்பட்டது. மனோஜின் உடலுக்கு பலரும் இறுதி அஞ்சலி செலுத்தி வரும் நிலையில், நாம் தமிழர் கட்சி ஒருங்கிணைப்பாளர் சீமான் நேரில் சென்று அஞ்சலி செலுத்தியதுடன் பாரதிராஜாவுக்கு ஆறுதல் கூறினார்.

பாரதிராஜாவுக்கும் சீமானுக்கும் இடையே அப்பா..மகன் என்ற பேரன்பு எப்போதும் இருப்பதை கண்டிருப்போம். சீமானை பார்த்ததும் மகன் இறந்த துயரம் தாளாமல் பாரதிராஜா கண்ணீர்விட்டு கதறினார். சீமானின் கைகளைப் பிடித்தபடி, மனோஜ் போய்விட்டான்டா என புலம்பியபடியே பாரதிராஜா கதறி அழுதது அனைவரின் நெஞ்சையும் கனக்க செய்தது. சீமானும் பாரதிராஜாவின் கைகளை இறுகக் கைப்பற்றியபடியே நின்று ஆறுதல் கூறினார்.

இதையும் படிங்க: ரூ.150 கோடி ஊழலுக்கு அரவிந்த் கெஜ்ரிவால் கைது.. அப்போ ரூ.1000 கோடிக்கு..? பாஜகவுக்கு சீமான் நறுக் கேள்வி.!!