அடிச்ச அடி அப்படி..! ரோஹித் சர்மா சர்ச்சையில் சிக்கி அடியோடு மாறிய ஷாமா முகமது..!

இந்திய அணி கேப்டன் ரோஹித் சர்மாவின் உடற்தகுதி குறித்து கேள்வி எழுப்பிய காங்கிரஸ் தலைவர் ஷாமா முகமது  சர்ச்சைகளுக்குள்ளானார். ரோஹித் சர்மா குண்டாக இருப்பதாக ஷாமா கூறியிருந்தார். அவர் எடை குறைக்க வேண்டும். இந்தியா இதுவரை பார்த்த கேப்டன்களிலேயே மிகவும் திறமையற்ற கேப்டன் அவர்தான் எனத் தெரிவித்து இருந்தார்... அவரது இந்த கருத்தால் சர்ச்சை அதிகரித்தது. இதனால், தனது சமூகவலைதளப்பதிவை நீக்கிவிட்டார்.

பின்னர் அவர் இதுகுறித்து விளக்கமளித்தபோது, 'இது ஒரு வீரரின் உடற்தகுதி குறித்த பொதுவான ட்வீட்.' இது உடலை அவமானப்படுத்துவது அல்ல. இது ஒரு வீரரின் உடற்தகுதி பற்றியது. ஒரு வீரர் எப்போதும் உடற்தகுதியுடன் இருக்க வேண்டும் என்று நான் நம்புகிறேன். அதனால், அவர் கொஞ்சம் அதிக எடை கொண்டவர் என்று நினைத்தேன் அதனால்தான் நான் ட்வீட் செய்தேன்'' எனத் தெரிவித்தார்.

இதையும் படிங்க: அரையிறுதியில் ஆஸி-யை வீழ்த்தி அபாரம்… ஹாட்ரிக் சாதனை படைத்த இந்திய அணி..!

ரோஹித் சர்மா குறித்து சர்ச்சைக்குரிய கருத்தை வெளியிட்ட பிறகு, ஷாமா முகமது, முன்னாள் இந்திய அணித் தலைவரும், நட்சத்திர பேட்ஸ்மேனுமான விராட் கோலி குறித்து ஒரு பதிவை வெளியிட்டுள்ளார். இதில், அவர் விராட் கோலியைப் பாராட்டியுள்ளார். சாம்பியன்ஸ் டிராபியின் அரையிறுதியில் இந்திய அணி வெற்றி பெற்ற பிறகு ஷாமா முகமது ஒரு பதிவை வெளியிட்டார்.

அதில் அவர், ''அற்புதமான வெற்றிக்கு இந்திய அணிக்கு வாழ்த்துக்கள். விராட் கோலியின் அற்புதமான ஆட்டம். ஐசிசி நாக் அவுட் போட்டியில் 84 ரன்கள் எடுத்து 1000 ரன்களை பூர்த்தி செய்ததற்காக அவருக்கு ஒரு பெரிய பாராட்டு'' எனத் தெரிவித்துள்ளார்.

இதுகுறித்து பேசிய அவர், ''ஆஸ்திரேலியாவுக்கு எதிரான அரையிறுதிப் போட்டியில் இந்தியா வெற்றி பெற்றதில் நான் மிகவும் மகிழ்ச்சியடைகிறேன். 84 ரன்கள் எடுத்த விராட் கோலியை நான் வாழ்த்துகிறேன். நான் மிகவும் உற்சாகமாக இருக்கிறேன். இறுதிப் போட்டியை எதிர்நோக்குகிறேன்'' என்றார்.

நேற்று துபாயில் நடைபெற்ற போட்டியில் விராட் கோலி 84 ரன்கள் எடுத்தார். அவரது செயல்திறனின் அடிப்படையில், இந்திய அணி, ஆஸ்திரேலியாவை 4 விக்கெட் வித்தியாசத்தில் தோற்கடித்தது. இறுதிப் போட்டியில் இந்திய அணி தென்னாப்பிரிக்கா, அல்லது நியூசிலாந்தை எதிர்கொள்ளும். இரு அணிகளுக்கும் இடையிலான போட்டியின் இரண்டாவது அரையிறுதிப் போட்டி இன்று பாகிஸ்தானின் லாகூரில் நடைபெறவுள்ளது.

இதையும் படிங்க: மைதானத்தில் குட்டி ரோஹித்தை கொஞ்சிய அனுஷ்கா சர்மா... வைரலாகும் புகைப்படம்!!