3-வது மகளிர் பிரீமியர் லீக் கிரிக்கெட் தொடரின் 3-வது கட்ட லீக் ஆட்டங்கள் லக்னோவில் நடைப்பெற்று வருகிறது. வடோதரா, பெங்களூரு, லக்னோ, மும்பை ஆகிய 5 நகரங்களில் நடைபெற்று வரும் லீக் சுற்றின் 20 ஆட்டங்கள் உட்பட இந்தத் தொடரில் மொத்தம் 22 ஆட்டங்கள் நடைபெறுகிறது.

ஒவ்வொரு அணியும் மற்ற அணிகளுடன் தலா 2 முறை மோதுகின்றன. புள்ளிகள் அடிப்படையில் முதலிடம் பிடிக்கும் அணியானது நேரடியாக இறுதிப் போட்டிக்கு முன்னேறும். 2 மற்றும் 3-வது இடம் பிடிக்கும் அணிகள் பிளே ஆஃப் ஆட்டத்தில் பலப்பரீட்சை நடத்தும்.

இதையும் படிங்க: சாம்பியன்ஸ் டிராபி 2வது அரையிறுதி போட்டி... நியூசிலாந்து - தென் ஆப்ரிக்கா அணிகள் மோதல்..!

இந்த நிலையில், 16-வது லீக் ஆட்டத்தில் தீப்தி ஷர்மா தலைமையிலான உ.பி. வாரியர்ஸ் அணி, ஹர்மன்பிரீத் கவுர் தலைமையிலான மும்பை இந்தியன்ஸ் அணியுடன் களம் கண்டன. இதில் டாஸ் வென்ற மும்பை அணி பந்துவீச்சை தேர்வு செய்தது.

அதன் அடிப்படையில் முதலில் பேட்டிங் செய்த உ.பி.வாரியர்ஸ் அணி நிர்ணயிக்கப்பட்ட 20 ஓவரில் 9 விக்கெட் இழப்பிற்கு 150 ரன்கள் எடுத்தது. 

இந்த ஆட்டத்தில் ஜார்ஜியா வோல் அரை சதம் அடித்து 55 ரன்களில் ஆட்டமிழந்தார். மேலும், கிரேஸ் ஹாரிஸ் 28 ரன்னும், தீப்தி ஷம்ரா 27 ரன்னும் எடுத்து இருந்தனர்.

மும்பை அணியை சேர்ந்த அமெலியா கெர் 5 விக்கெட்டும், ஹெய்லி மேத்யூஸ் 2 விக்கெட்டும் வீழ்த்தினர்.

பின்னர், 151 ரன்கள் எடுத்தால் வெற்றி என்ற இலக்குடன் களமிறங்கியது மும்பை அணி. அப்போது, ஹெய்லி மேத்யூஸ் அரை சதம் அடித்த நிலையில், 68 ரன்களில் ஆட்டமிழந்தார்.

இறுதியில், மும்பை அணி 18.3 ஓவர்களில் 4 விக்கெட் இழப்பிற்கு 153 ரன்களை எடுத்து அபார வெற்றி பெற்றது. இது மும்பை அணி பதிவு செய்யும் 4வது வெற்றி. 

இதையும் படிங்க: முதல்வரின் தேர்தல் வாக்குறுதி! கோவை கிரிக்கெட் மைதானத்திற்கு கிடைத்த தடையில்லாச் சான்று!!!