தமிழகத்தில் முற்போக்கு மதச்சார்பற்ற ஜனநாயக சக்திகள் இணைந்து தேர்தலை எதிர்கொள்வது என்று முடிவு செய்துள்ளோம் என்று மார்க்சிஸ்ட் கம்யூனிஸ்ட் கட்சியின் தேசிய பொதுச்செயலாளர் எம்.ஏ. பேபி தெரிவித்துள்ளார்.

மார்க்சிஸ்ட் கம்யூனிஸ்ட் கட்சியின் புதிய தேசிய பொதுச் செயலாளரான எம்.ஏ.பேபி, சென்னையில் முதல்வர் மு.க.ஸ்டாலினை சந்தித்து பேசினார். பின்னர் அவர் செய்தியாளர்களைச் சந்தித்து பேசினார்.  அப்போது அவர் கூறுகையில், "தமிழக முதல்வர் மு.க.ஸ்டாலினை சந்தித்தபோது, மதவாத சக்திகளுக்கு கடும் பதிலடி கொடுக்க வேண்டும் என்று சொன்னேன். ஜனநாயக மதச்சார்பற்ற, முற்போக்கு அரசியல் சக்திகள் தலைமையில் தமிழக மக்களை ஒருங்கிணைத்துள்ளது குறித்தும், அதை வலுவாக இன்னும் கட்டியெழுப்புவதில் திமுகவின் பங்களிப்பு குறித்தும் முதல்வரிடம் பேசினோம்.

இந்தியாவில் ஆர்எஸ்எஸ் வழிகாட்டுதலின்படி, பிரதமர் நரேந்திர மோடி தலைமையிலான மத்திய அரசு மதச்சார்பின்மை, சிறுபான்மையினர் உரிமை, ஜனநாயக உரிமைகளை திட்டமிட்டு சீர்குலைத்து வருகிறது. வக்பு திருத்த மசோதாவை, நாடாளுமன்றத்தில் மத்திய அரசு நிறைவேற்றியுள்ளது, சிறுபான்மையினர் உரிமைகள் எவ்வாறு தாக்கப்படுகின்றன என்பதற்கு சமீபத்திய உதாரணம் ஆகும். நாடாளுமன்றத்தில் இந்த வக்பு மசோதாவுக்கு எதிராக அதிமுக வாக்களித்தது. அதேநேரத்தில், அவர்கள் பாஜகவுடன் சேர்ந்தது சிறுபான்மையினருக்கு எதிரானதாது ஆகும். வக்பு சட்டத்தின் பல விதிகள் சிறுபான்மையினருக்கு அரசியல் சாசன உத்திரவாதம் அளிக்கப்பட்டுள்ளதற்கு எதிராக உள்ளது என உச்ச நீதிமன்றம் கூறியுள்ளது.

இதையும் படிங்க: பாஜக-ஆர்.எஸ்.எஸ்-ஐ வீழ்த்தியாகணும்.. மதசார்பற்ற சக்திகள் ஒன்னு சேருங்க.. அழைப்பு விடுக்கும் பிரகாஷ் காரத்.!!

ஆளுநர் தமிழக சட்டப்பேரவையில் நிறைவேற்றி அனுப்பிய சட்ட முன்வடிவுகளுக்கு ஒப்புதல் அளிக்காமல் நிறுத்தி வைத்திருந்தது சட்ட விரோதம் என்று உச்ச நீதிமன்றம் தீர்ப்பு அளித்துள்ளது. தமிழக அரசுக்கு சாதகமாகத் தீர்ப்பை சட்டப் போராட்டத்தின் மூலம் பெற்று தந்த தமிழக முதல்வருக்கு என்னுடைய வாழ்த்துகள். இன்னும் ஓர் ஆண்டுக்குள்  சட்டப்பேரவை தேர்தல் வரும் நிலையில், தமிழகத்தில் முற்போக்கு மதச்சார்பற்ற ஜனநாயக சக்திகள் இணைந்து தேர்தலை எதிர்கொள்வது என்று முடிவு செய்துள்ளோம். மேலும், இந்த அணி ஒட்டுமொத்த நாட்டுக்கே முன்மாதிரியாக இருக்கும்." என்று எம்.ஏ. பேபி தெரிவித்துள்ளார். 

இதையும் படிங்க: மூன்றாவது முறையாக அதிமுக - பாஜக கூட்டணிக்கு தோல்வி உறுதி.. விளாசும் முதல்வர் மு.க. ஸ்டாலின்.!!